Zer dira sexu-transmisiozko gaixotasunak (STG)?
- Sexu-harremanetan (bagina, uzki edo aho bidezkoetan) edota ukimenaren bidez transmititzen diren infekzioak dira.
- Batez ere, organo genitaletako muki-mintzetan hazten diren bakterio, birus, onddo edo parasitoek eragiten dituzte.
STG GEHIENEK PREBENTZIO ETA TRATAMENDU ERRAZA DUTE
- Horietako batzuek ondorio larriak izan ditzakete egoki tratatu ezik.
- Preserbatiboa eraginkorra da STG gehienak prebenitzeko, nahiz eta kasu batzuetan ez dituen guztiz ezabatzen kutsatzeko aukerak.
- Preserbatiboak estaltzen duen eremua baino ez du babesten, eta kasu batzuetan (herpesa, giza papilomaren birusa, etab.) lesioa eremu horretatik kanpo kokatzen da.
Nork izan dezake sexu-transmisiozko gaixotasunen bat (STG)?
SEXUALKI AKTIBOA DEN EDONORK IZAN DEZAKE
Nola jakin dezaket sexu-transmisiozko gaixotasunen bat (STG) daukadan?
- STG bat daukazun jakiteko modu bakarra medikuarengana joatea da, eta horretarako dauden probak egitea.
Horietako infekzio askok ez du ageriko sintomarik.
Zer da sifilia?
- Bakterio batek eragindako sexu-transmisiozko infekzioa da; hainbat motatako sintomak izan ditzake denbora luzean zehar.
- Hasieran, minik ematen ez duen ultzera bat agertzen da kontaktua izan den tokian (genitalak, ahoa edo uzkia), eta, zenbaitetan, ez da begi hutsez bereizten.
- Antibiotikoekin sendatzen da.
Zer da gonorrea?
- Bakterio batek eragindako sexu-transmisiozko infekzioa da.
- Honako hauek dira sintomarik ohikoenak: baginako jarioa handitzea, jariakinak zakilean edo erredura sentsasioa txiza egitean. Inolako sintomarik ez hautematea ere gerta liteke.
- Sexu-harremanetan transmititzen da (bagina, uzki edo ahokoak); horregatik, genitaletan ez ezik, ondestean eta eztarrian ere ager daiteke.
- Antibiotikoekin sendatzen da.
Zer da klamidia?
- Bakterio batek eragindako sexu-transmisiozko infekzioa da.
- Gonorrearen antzeko sintomak ditu eta hau ere bagina, uzki edo aho bidezko sexu-harremanetan transmititzen da.
- Kasuen erdietan baino gehiagotan, ez du sintomarik sortzen.
- Antibiotikoekin tratatzen da.
Zer da herpes genitala?
- Birus batek sortzen du eta babatxo minberak eragiten ditu; bagina, uzki eta aho bidezko sexu-harremanetan eta lesioa duen azala ukitzean transmititzen da.
- Ez dago herpesa guztiz sendatzen duen tratamendurik, baina birusaren kontrako botikak erabiltzen dira agerraldien intentsitatea moteltzeko.
Zer da giza papilomaren birusa?
- Birus bat da, eta izenak dioen bezala, garatxoak sorrarazten ditu barruko eta/edo kanpoko genitaletan eta uzkiaren inguruan.
- Bagina, uzki eta aho bidezko sexu-harremanetan eta lesioa duen azala ukitzean transmititzen da.
- Infekzio gehienek ez dute sintomarik eta berez desagertzen dira, baina kasu bakar batzuetan, umetoki-lepoko minbizia eragin dezake.
- Gaur egun, kasu gehienetan, minbizi mota hori prebenitzeko txertoa erabiltzen da. Txertoen egutegian onartua dago.
Iturria: Gobierno Vasco